Elkar hobeto ezagutzeko, esan iezaguzu labur-labur nor zaren eta zertan zabiltzan gaur egun.

Sonia Aguayo naiz, 29 urteko aguraindarra. Gaur egun historiako irakasle lanetan ari naiz. Nire ikasketak historia arloan egin nituen, baina ikus-entzunezkoen modulu bat ere burutu nuen. Modulu horretan bideo batzuk sortzea eskatu zigutenean, lagun batzuekin elkarlanean hasi nintzen eta ikus-entzunezko lanekiko zaletasuna piztu zitzaidan. Hori eta gero, hainbat proiektu sortu ditugu: ni arduratu naiz zuzendaritza, gidoigintza, kameraren erabilera, soinuaren grabaketa eta ekoizpenaz.

Lehenengo laburmetraia "Sakamantekas" izeneko istorioan oinarritu genuen. Hurrengo urtean, Aguraingo beste antzerki talde batekin elkarlanean aritu ginen, urteak zeramatzaten jarduerarik gabe eta nik proposamen bat egin nien. Urte hartan lan bateratua egin genuen, baina ondoren banandu ginen eta bakoitza bere aldetik jarraitu zuen.

Taldea herriko gazteez osatuta dago, 25 eta 35 urte artekoak. Urtez urte partaide batzuk finkoak izaten dira, eta beste batzuk aldakorrak. Aurten hamar bat lagun gara, eta asteartero biltzen gara; udaletxeak lokala uzten digu entseguetarako. Azken entseguak Aguraingo harresian egiten ditugu

Non bizi zara, eta zer nabarmenduko zenuke zure herri edo kuadrillatik?

Agurainen bizi naiz. Nire ustez, herrian eskaintza kulturala eta soziala badago, baina jendeak ez du behar bezala aprobetxatzen, eta antolatzen diren ekintzetan parte-hartzea urria izaten da.

Zein izan da zure prestakuntza-ibilbidea, eta zergatik aukeratu zenuen bide hori?

Historia ikasi nuen, eta ikus-entzunezkoen modulu bat osagarri moduan. Historiarekiko interesa nuen, eta ikus-entzunezko mundua ezagutu ahala, horrekiko zaletasuna ere sortu zitzaidan.

Zein da zure egungo lan-egoera eta nola iritsi zinen horretara?

Irakasle gisa lan egiten dut gaur egun, baina nire jardun artistikoak toki garrantzitsua du nire egunerokoan.

Nola sortu zen “Larevoltosafilm”?

Ikus-entzunezkoen moduluan sortu genuen lehen lan baten ondorioz, hainbat lagun elkartu ginen bideo batzuk egiteko. Gustura aritu ginenz, proiektua handitzen joan zen, eta hortik sortu zen “Larevoltosafilm”.

Nor osatzen duzue gaur egun konpainia?

Taldea 10 bat gaztek osatzen dugu, nahiz eta urtez urte osaketa aldakorra izan. Parte hartzaileek profil eta esperientzia ezberdinak dituzte, eta guztiek ekarpen desberdinak egiten dituzte.

Nolako harrera izan du herrian zuen ekimenak?

Hasieran antolatzea kostatu zitzaigun, baina gero arrakasta izan dute. Aguraingoaz gain, Dulantzin eta Araian ere aurkeztu ditugu gure lanak, eta orokorrean, harrera oso ona izan dute.

Uste duzu antzerkiak eragin positiboa izan duela herriko giroan edo gazteen ikuspegian?

Bai, nire ustez proiektu honek eragin positiboa izan du. Kultur ekimen batek futbola bezalako beste jarduerek bezala jendea mugitu du, eta lehen aldiz gazte askok elkarrekin parte hartu dute jarduera kultural batean. Besteak beste, Bizipozarekin egindako lankidetzan jende mota askotarikoa batu da.

Zein dira konpainiaren etorkizunerako planak?

Momentuz antzerkiarekin jarraitzeko asmoa dugu. Iaz “Gazteek gazteentzat” diru-laguntza eskatu genuen, nahiz eta oraindik baliabide ekonomiko nahikorik ez izan proiektu guztiak gauzatzeko. Konpainiako kide guztiek ez dute ordainsaririk jasotzen; nik eta argi teknikaria soilik kobratzen dugu.

Hurrengo emanaldiak maiatzaren 31n, ekainaren 1ean eta 6an izango dira. "Arte Herria" proiektuaren barruan daude; horren helburua Aguraingo artistak kalera ateratzea da. Diru-laguntzarik jaso ez arren, artistak animatzen dituzte euren lana publikoari erakustera. Niri, liburu bat idaztea gustatuko litzaidake, besteak beste, baina oraindik ez dakit nola edo noiz egingo dudan.

Zer esango zenioke beste herri bateko gazte bati, antzeko zerbait sortu nahi badu?

"Aurrera!" esango nieke, proiektu horiek beti esperientzia aberasgarriak dira, eta saiatzeko gonbita luzatuko nieke.

Sentitzen al zara ordezkatuta zure herriko jarduera edo proiektuetan? Zergatik?

Bai, batez ere jaietako txosnagunean, non gazteek lan handia egiten dugun, esango nuke horrelako ekimenetan parte hartze handia dago.

Independizatu al zara? Zure herrian etxebizitza-eskaintza nahikoa dagoela uste duzu?

Ez, ez naiz independizatu, eta oso zaila ikusten dut. Etxebizitza eskaintza oso urria da hemen, eta dagoena oso garestia da. Hori dela eta, proiektu interesgarriak garatzeko Madrilera edo beste hirietara jo beharra izatea ez zait gustatzen; izan ere, Agurainen bizitzea gustatuko litzaidake.

Zure ustez, landa-bizitzaren zein alderdi behar luke hobekuntzarik?

Garraioa hobetzea funtsezkoa dela uste dut. Hiri nagusietara joatea erraza da, baina inguruko herrietara heltzea oso zaila da.